Fiksimini Sunda: Gamis Lebaran

jabaribernews.com -- Reueus, dipangmeulikeun baju lebaran ku salaki. "Ti jongko sésa ékspor," cénah. Alias loakan téa meureunan. Tapi da kasebut loakan gé aralus kénéh pisan. Keur si Nénéng, busana muslim sasetél, baju kaos dua, calana panjangna hiji. Mani surak ajrag-ajragan, harita kénéh langsung diajaran hiji-hiji. Keur kuring baju gamis dua. Nu hiji pulas héjo ngora dipaés payét lebah dada, hiji deui warna bodas rapang ku muté harérang mani buburicakan. Nu bodas mah keur pakéeun engké Raya. Nu hejo ngora tuluy dipaké ayeuna ka pangaosan. Tablig Akbar di Masjid Désa. Pédé ayeuna mah milu ngabring jeung ibu-ibu majlis ta'lim téh, da maké gamis ginding, unggal mah rék ula-ilu téh éra teu boga baju nu mantes.

Baca Juga: 8 Poin Alasan Penting untuk Meninggalkan Budaya Jam Karet

Anjog ka tempat pangaosan, kasampak masjid geus pinuh, kuring sabatur-batur geuwat marilihan tempat. Palebah lawang asup, aya budak awéwé ngengenyang leungeun indungna, nununjuk ka kuring bari nyorowok tarik pisan, "Mamah! Mamah! Itu siga gamis mamah nu basa kapungkur ical tina jemuran!!" ***