Fiksimini Sunda: Nu ngaringkuk di Pos Ronda

jabaribernews.com -- Jam sabelas peuting pamajikan ngageuingkeun, "Rék ngaronda, moal?"
Maksakeun hudang sanajan bari horéam. Inget kana kawajiban. Sasarina mah mun jadwal ngaronda  sok disalampeur ku Mas Éko  jeung Si Uus. Aya béja duanana ogé garering. Kapaksa peuting ayeuna ngarondana ukur duaan jeung Mang Ocid.
Ari Mang Ocid, ngaronda téh ukur mindah saré. Tara daék diajak nguriling, ngaguher wé di pos kamling nepi ka isuk janari.

Baca Juga: Pupujian Eling Eling Umat Pikeun Ngajak Sholat , Aya Dina Wangun Lagu Rap ti Ebiet beat A

Anjog ka pos ronda, enya wé kasampak mang Ocid geus ngaringkuk diharudum sarung nyanghareup ka juru. Ku kuring lebah bujurna ditoélan ku sénter.
"Mang! Hudang, Mang! Hayu patroli!" Nu morongkol angger ngaréngkol. Ditoél deui, "Mang!"
Hiliwir... peledek... "Gélo! Kalah némbalan ku bujur!" Kuring ngajleng ngajauhan nu nonggéng, "Anjir!!! Naha tas dahar nanahaeun, Mang Ocid?! Hitut bet bau-bau teuing?! Hangru! Bijil jeung bukurna sugan?"
Nu boga lalakon angger tibra, teu maliré ka nu keur uhak-ohék ngambeu nu beuki mabek.
Ahirna ngincid sorangan bari ambek. Najis kudu nungguan nu keur réhé ngabangké.
Ngagidig sorangan ngurilingan paimahan bari mupul beas pérélék, diwadahan dina kérésék.

Baca Juga: Kabandang ku Kuda Lumping Buku Sunda Kénging Ahmad Bakri, Balukar Keur Budak nu Hésé Diatur

Barang nepi ka imah Mang Ocid, kasampak wadah pérélékna kosong kénéh. Sigana pamajikanana pohoeun, teuing geus mihapé tadi ka Mang Ocidna bari indit. Tamba panasaran  dicalukan: "Pérélééék!"
Pamajikan mang Ocid némbalan : "Ronda?! Iwan lain?!"
"Eu!"
Teu lila kadéngé sada nu guntreng di jero, tuluy kulutrak, panto hareupna muka.
"Duh, hampura, Wan! Kasaréan!"
Kuring olohok, ngahunted, geuning nu bijil téh Mang Ocid, ari nu di pos ronda tadi....
Rey, muringkak bulu punduk. Inget ka nu ngaringkuk jeung bau bugang nu tadi disangka bau hitut. ***