Fiksimini Sunda: Satengahing Sagara Tresna

jabaribernews.com -- Calik sidéngdang dina batu karang. Hahaleuangan. Implengan nyawang waktu ka tukang. Mangsa nulungan salira nu tikelebuh. Nyawa anjeun kasalametkeun. Ngan harita urang duaan tuluy tikelebuh dina sagara katresna, kekerelepan dina lautan kasmaran, maheutkeun cinta.
“Teu éling budak téh, bogoh mah ka sasama urang wé atuh, ulah kanu jararauheun teuing!” Ah, teu didèngè ieuh éta omongan kolot harita.

Baca Juga: Doa Nabi Adam Memohon Ampunan Setelah Terusir dari Surga, Dilengkapi Nadhom Bahasa Sunda.

Panutan, naha kamana atuh anjeun téh? Unggal wanci kuring nganti. Taya bèja taya carita. Kasono ngagulidag lir lambak. Indit balik heula ka darat caritana rèk sajorélat, moal lila pasti kadieu deui nèang kuring pikeun dikawin.
Dua puluh taun, Kang, dua puluh taun kuring nungguan. Umur beuki kolot, kulit beuki paréot, buuk beuki muruluk, sisit beuki morolok. Yeuh, kuring di dieu, bèlaan dijarauhan ku balad jeung baraya. Ukur hayang pasini ngahiji jeung pujaan ati. Naha anjeun sulaya tèh pèdah raga kuring dianggap teu sampurna, tina beuteung ka handap ukur buntut lauk lain suku jelema? Inget ka dinya, kuring ukur bisa nyasalah kana kadar.
Gudibeg, teuleum sajero-jerona, nyieuhkeun cimata nu nyuruluk ngabatu jadi mutiara di antara cai sagara. ***