jabaribernews.com -- Tengah peuting malem welasan, marengan caang bulan narawangan, Odang asruk-asrukan, norobos kebon, milipir ti paimahan. Nu ditujuna imah Haji Jénal, juragan matrial.
Sabenerna Odang sangheuk kikieuan téh. Tapi rudet ngadéngé pamajikan nu ngécéplék waé, hayang meuli éta meuli itu, hayang boga ieu boga itu. Najan horéam kapaksa dilakonan. Da hasilna ogé mémang lumayan. Nu tiheula ogé mahi dipaké bekel sabulan, malah mah leuwihan. Da Odang mah teu hayang hirup méwah bro-broan, ukur hayang pangabutuhna kacumponan. Ngan pamajikanana ngurihit nempo modeu dangdanan batur nu weléh gunta-ganti. Babari pisan hareudang ku banda tatangga.
Anjog ka tukangeun imah Haji, nyulumun heula tukangeun rungkun, nalingakeun kaayaan. Sanggeus katempo aman, beretek nyampeurkeun panto dapur. Naplokeun awakna kana témbok. Gulusur... mapayan témbok.
Baca Juga: Indonesia Berada di Lingkaran Rawan Gempa Bumi The Ring of Fire
Bray! Odang ngejat. Aya cahaya nu nyorot kana awakna.
"KAPANGGIIIH!!! YEUH DI DIEU!!!" Corowok jalma nu nyorotkeun sénter.
"DI MANA, EUY?!!!"
"TÉWAAAAK!!! TÉWAAAAK!!!"
Odang rungah-ringeuh. Cilaka! Geuning loba jelema?!
Cerelet! Odang lumpat, norobos rungkun remek beling.
"Kabur, euy! Pegatan ti béh dinya!"
"KADÉ LOLOS! KEPUUUNG!"
Jalma patinggorowok ti ditu ti dieu. Sénter patingbaranyay. Odang bingung, linglung. Manéhna katingker, geus euweuh jalan pikeun kabur. Suruduk kaditu, gok! suruduk kadieu, gok! Odang ukur kuralang-kuriling bari nguak-nguik jeung sesegrok.
Baca Juga: Saling Tampar, Begitulah Cara Senior Pramuka SMAN 1 Ciamis Membentuk Karakter
"Tuh! Nyulumun kana dapuran tangkal cau!"
Artikel Terkait
Kanyaah Indung
Wangsit Siliwangi
Kala Sunda, Kalender Sunda, Leuwih Kolot Batan Kalender Masehi
Arimbi dari Pringgandani, Ratu Raksasa Ibunda Gatotkaca
Topi Surga, Tentang Kebohongan Abu Nawas
Fiksimini Sunda: Pageuh